संशयीत आरोपींवर खुनाचा गुन्हा दाखल करून अटक करा-बिरसा फायटर्सची मागणी

उपविभागीय पोलीस अधिकारी दत्ता पवार यांना निवेदन

चित्रा न्युज प्रतिनिधी 

शहादा : मक्कनसिंग मोतीसिंग पवार,सुरक्षारक्षक मुक्काम धांदे खुर्द तालुका शहादा याचा अपघात नसून घात म्हणजे मारहाण करून खून करण्यात आला आहे.फिर्यादी व साक्षीदारांच्या जबाबावरून संशयीत आरोपींविरुद्ध खूनाचा गुन्हा दाखल करून अटक करा,अशी मागणी बिरसा फायटर्स नंदूरबार संघटनेकडून उपविभागीय पोलीस अधिकारी दत्ता पवार यांच्याकडे एका निवेदनाद्वारे करण्यात आली आहे.बिरसा फायटर्सचे राष्ट्रीय अध्यक्ष सुशिलकुमार पावरा,सुरेश वळवी,संजय चौधरी,रामसिंग ठाकरे,मयाराम वाघ,विष्णू सोनवणे,करन सनेरआदि ७० पेक्षा अधिक महिला पुरूष  कार्यकर्ते उपस्थित होते.

                       शहादा तालुक्यातील मामा मोहिदे रस्त्यावर दिनांक ६ जून २०२५ ला सायंकाळी ७.३० च्या सुमारास दोन मोटारसायकलचा अपघात झाला,त्यापैकी मक्कनसिंग मोतीसिंग पवार यांचा दिनांक ११ जून २०२५ ला उपचारादरम्यान मृत्यू झाल्यानंतर शहादा पोलीस ठाण्यात संशयित आरोपी जितेंद्र सोमा कोळी राहणार मोहिदा याच्यावर भारतीय न्याय दंड संहिता २०२३ कलम १०६(१),२८१ व मोटार वाहन अधिनियम १९८८ नुसार कलम १८४,१३४,१८७ अन्वये गुन्हा दाखल करण्यात आला आहे.

                        घटना ६ जून २०२५ ला घडली असतांना शहादा पोलिसांनी आमची फिर्याद घेण्यास टाळाटाळ केली.आदिवासी संघटनांच्या पदाधिकाऱ्यांच्या पुढाकाराने अखेर ११ जून २०२५ रोजी अपघाताचा गुन्हा दाखल करण्यात आला आहे.परंतू हा अपघात नसून जितेंद्र कोळी व त्याच्या साथीदारांनी माझ्या भावाला जखमी अवस्थेत असतांना लाथा बुक्यांनी मारहाण करीत असतांना रस्त्यावर येणा-या जाणा-या लोकांनी बघितले आहे. त्यापैकी काही  साक्षीदारांनी तसे जबाब नोंदवले आहेत.म्हणून माझ्या भावाचा मृत्यू हा फक्त अपघाताने झाला नसून त्याला जखमी अवस्थेत बेदम मारहाण केल्यामुळे झाला आहे.हा अपघात नसून घात आहे.म्हणून संशयीत आरोपींची सखोल चौकशी करून आरोपीविरुद्ध फक्त अपघाताचा गुन्हा दाखल न करता खुनाचा गुन्हा दाखल करण्यात यावा,अशी मागणी मयतचे नातेवाईक करीत आहेत. अपघात झालेले मोटारसायकल सुद्धा शहादा पोलिसांनी परस्पर कोणालाही न माहीत पडता संशयास्पद स्थितीत पोलीस ठाण्यात आणून ठेवले असून अपघात च्या दिवशीचे मोटार सायकल चे फोटो व आताचे मोटार सायकलची स्थिती यात जमीन आसमानचा फरक दिसत आहे. माणूस मेला तरी त्याच्या मोटार सायकलला काहीच झाले नाही,काहीच का फुटले नाही? असे सवाल करत शहादा पोलिसांनी आरोपीला वाचविण्यासाठी मोटारसायकलच्या अपघातात मक्कनसिंग याचा मृत्यू झाल्याचे दाखवण्यासाठी  बनावट पणा करीत आहेत,असे सांगत मयतच्या नातेवाईकांनी शहादा पोलिसांच्या तपासावरच संशय निर्माण केला आहे.