खांडवी ग्रामपंचायत सदस्य प्रमोद घोडके अपक्ष उमेदवार म्हणून बार्शी विधानसभा निवडणुकीत दाखल

चित्रा न्युज ब्युरो

सोलापूर :-  बार्शी तालुक्यातील खांडवी येथील ग्रामपंचायत सदस्य प्रमोद घोडके यांनी अपक्ष उमेदवारी अर्ज भरून विधानसभेच्या निवडणुकीत प्रवेश केला आहे. त्यांनी काल बैलगाडीवरून बार्शी येथे येत आपला उमेदवारी अर्ज दाखल केला. त्यांच्या या अनोख्या पद्धतीने अर्ज दाखल करण्याने अनेकांचे लक्ष वेधले आहे.

प्रमोद घोडके यांनी सांगितले की, "ही निवडणूक शेतकऱ्यांची आहे आणि माझी उमेदवारी शेतकऱ्यांच्या हक्कांसाठी आहे. ग्रामपंचायत सदस्य म्हणून मी पहिल्याच टर्ममध्ये जनतेच्या विश्वासाने काम केले आहे, आणि आता त्याच विश्वासावर मी आमदारकीच्या निवडणुकीत उतरण्याचा निर्णय घेतला आहे."

प्रमोद घोडके हे पहिल्यांदाच ग्रामपंचायत सदस्य म्हणून निवडून आले असून त्यांच्या कार्यकाळात त्यांनी शेतकरी, ग्रामीण विकास आणि सर्वसामान्यांच्या समस्यांवर विशेष लक्ष केंद्रित केले आहे. घोडके यांनी सांगितले की, "शेतकऱ्यांचे हित आणि त्यांच्या प्रश्नांवर माझा ठाम निर्धार आहे. माझ्या उमेदवारीतून शेतकऱ्यांच्या समस्या विधानसभेत पोहोचवण्याचा संकल्प आहे."

प्रमोद घोडके यांचा अपक्ष उमेदवार म्हणून विधानसभा निवडणुकीत उतरण्याचा निर्णय बार्शीतील मतदारांसाठी एक नवा पर्याय ठरला आहे. गावपातळीवर काम करणारा आणि शेतकऱ्यांचा आवाज बनणारा उमेदवार म्हणून घोडके यांनी जनतेसमोर स्वतःला मांडले आहे. त्यांचा असा विश्वास आहे की शेतकऱ्यांच्या समस्यांचा निर्णायक तोडगा काढण्यासाठी आणि त्यांना योग्य न्याय मिळवून देण्यासाठी त्यांची भूमिका महत्त्वपूर्ण ठरू शकते.

बार्शी विधानसभेतील मतदार या निवडणुकीत ग्रामपंचायत स्तरावरून आलेल्या प्रमोद घोडके यांना एक नवीन उमेदवार म्हणून कसा प्रतिसाद देतील, हे पाहणे उत्सुकतेचे ठरणार आहे.