सिमेंट काँक्रिट रस्ता बांधकाम निकृष्ट प्रतीचे

• दिघोरी/नान्होरी येथील प्रकार 

• कंत्राटदार व तांत्रिक पॅनल अधिकाऱ्याचे संगनमत

कालिदास खोब्रागडे चित्रा न्युज

भंडारा :- ग्रामीण परिसरात पायाभूत सुविधा उपलब्ध करण्यास शासनाने प्रयत्नशील असून अनेक योजनांचे माध्यमातून आवश्यक तो निधीही उपलब्ध करतो. पण क्रियान्वयन यंत्रणेतील काही भ्रष्ट लोकसेवकांमुळे उद्देशपूर्ती होत नाही. याचा प्रत्यय दिघोरी/नान्होरी येथे आला. महाराष्ट्र ग्रामीण रोजगार हमी योजनेअंतर्गत तयार करण्यात येत असलेल्या सिमेंट काँक्रिट रस्ता बांधकामात कंत्राटदार व तांत्रिक पॅनल अधिकाऱ्याच्या संगनमताने साहित्याचा अल्प प्रमाणात वापर केल्यामुळे बांधकाम निकृष्ट प्रतीचे होत आहे. 

                            महाराष्ट्र ग्रामीण रोजगार हमी योजनेअंतर्गत १० ते १२ वर्षापूर्वी दिघोरी/नान्होरी येथे दादा कुळमते ते राधेश्याम निरगुळे यांचे घरापर्यंत मातीकाम करण्यात आले होते. पण खडीकरण केले गेले नसल्यामुळे पावसाळ्यात या रस्त्यावर चिखलाचे साम्राज्य असल्याने या रस्त्यावरून आवागमन करतांना शेतकऱ्यांना गैरसोयीचे होत असे. शेतकऱ्यांसह गावकऱ्यांची जाण्यायेण्याची सोय व्हावी. या करिता सरपंच शरद ईटवले व ग्रामपंचायत कमिटीचे मागणी वरून काँग्रेस चे प्रदेशाध्यक्ष तथा साकोली विधानसभा क्षेत्राचे आमदार नाना पटोले यांचे प्रयत्नाने आर्थिक वर्ष २०२३-२४ मध्ये २३ लाख १३ हजार ५४५ रुपये अंदाजपत्रकीय रकमेच्या सिमेंट काँक्रिट रस्ता बांधकामास मंजुरी प्रदान करण्यात आली. बांधकामाचा करारनामा ग्रामपंचायत दिघोरी चे नावाने असून यावर तांत्रिक मार्गदर्शन, देखरेख व सनियंत्रणाचे काम तांत्रिक पॅनल अधिकारी(कृषी) गिरीधर मेश्राम यांचेकडे सोपविण्यात आले आहे. 

                       करारनामा ग्रामपंचायतीचे नावाने असला तरी टक्केवारीने हे सिमेंट काँक्रिट रस्ता बांधकाम साकोली तालुक्यातील एका कंत्राटदारास देण्यात आले आहे. तांत्रिक पॅनल अधिकाऱ्याशी कंत्राटदाराने संगनमत करून सिमेंट काँक्रिट रस्ता बांधकामात अंदाजपत्रकात दर्शविल्या प्रमाणे साहित्याचा वापर केला गेला नसल्यामुळे सिमेंट काँक्रिट रस्ता बांधकाम निकृष्ट प्रतीचे होत आहे. या रस्ता बांधकामाची वरिष्ठ पातळीवरून चौकशी करून सत्यता जनतेसमोर आणणे आवश्यक झाले आहे. 

*माहिती व सूचना फलक नाही(चौकट)*

कोणत्याही शासकीय योजनेअंतर्गत विकास कामांची सुरुवात करतांना दर्शनी भागात माहिती व सूचना फलक लावून त्यावर कामाचे नाव, अंदाजपत्रकिय रक्कम, आर्थिक वर्ष, यंत्रणेचे नाव, काम सुरू झाल्याचा दिनांक व काम पूर्ण झाल्याचा दिनांक लिहिणे बंधनकारक असताना महाराष्ट्र ग्रामीण रोजगार हमी योजनेअंतर्गत तयार करण्यात येत असलेल्या सिमेंट काँक्रिट रस्ता बांधकामावर माहिती व सूचना फलक लावले गेलेच नाही. 

*मजूरांना सुरक्षा उपकरणे पुरवली नाही(चौकट)*

सिमेंट काँक्रिट रस्ता बांधकामात सिमेंट व गिट्टीचे योग्य मिश्रण व्हावे. या करिता मिक्सर मशीन चा वापर करण्यात येत असल्यामुळे धोकादायक श्रेणीत येते. या बांधकामावर काम करणाऱ्या मजुरांना जुते, हातमोजे, चष्मा व हेलमेट ही सुरक्षा उपकरणे कंत्राटदाराकडून उपलब्ध करणे आवश्यक असताना दिघोरी येथे महाराष्ट्र ग्रामीण रोजगार हमी योजनेअंतर्गत तयार करण्यात येत असलेल्या सिमेंट काँक्रिट रस्ता बांधकामावरील मजूरांना सुरक्षा उपकरणे पुरविली गेली नाही.