डॉ. बाबासाहेब आंबेडकर यांचा अपमान करणाऱ्यांना अटक करा; वंचित बहुजन आघाडीचा मोर्चा

चित्रा न्युज प्रतिनिधी

 गडचिरोली -  सोमनपल्ली येथे डॉ.बाबासाहेब आंबेडकरांचा अपमान करणाऱ्या समाजकंटकांना अटक करा या मागणीसाठी वंचित बहुजन आघाडीने मोर्चा काढला होता. यावेळी जातीयवादी विकृताला तात्काळ अटक करण्याची मागणी  जिल्हाधिकारी व पोलिस अधिक्षक यांच्याकडे करण्यात आली.  सोमनपल्ली येथील इंदिरा गांधी चौकात निदर्शने आंदोलन करण्यात आले.

         

वंचित बहुजन आघाडीचे पूर्व विदर्भ समन्वयक बाळू टेंभुर्णे यांच्या नेतृत्वातील आंदोलकांनी जिल्हाधिकारी अविश्यांत पांडा  व जिल्हापोलिस अधिक्षक निलोत्पल यांची संयुक्त भेट घेऊन घटनेचे गांभीर्य लक्षात आणून देऊन  तात्काळ अटक करण्याची मागणी लावून धरली. यावेळी जिल्हाधिकारी व पोलिस अधिक्षकांनी यांनी सांगितले की, या घटनेतील दोषींना अटक करण्यासाठी पोलिसांच्या चार तुकड्या घटनेच्या संदर्भाने तपास करत आहेत, विकृत नराधमाला लवकरच अटक करण्यात येईल असे आश्वासनही दिले.

        

यावेळी जिल्हाधिकारी व पोलिस अधिक्षक यांच्याशी चर्चा करतांना बाळू टेंभुर्णे म्हणाले की, आंबेडकरी जनतेच्या भावना दु:खावल्यामुळे जनतेत तीव्र संताप आहे. त्यामुळे कोणत्याही प्रकारचा रोष निर्माण होण्याआधी आपण विकृत मानसिकता असलेल्या आरोपीला २४ तासात अटक करून  दोषींवर कडक कारवाई करावी, अन्यथा वंचित बहुजन आघाडीच्यावतीने तीव्र आंदोलन करण्याचा इशाराही देण्यात आला.

         

या आंदोलनाचे नेतृत्व वंचित बहुजन आघाडीचे पूर्व विदर्भ संयोजक बाळू टेंभुर्णे, जेष्ठ नेते जी. के. बारसिंगे, जेष्ठ नेते भरत येरमे, विलास केळझरकर यांनी केले. या आंदोलनात वंचित बहुजन आघाडीचे शहराध्यक्ष तुळशिराम हजारे, युवक आघाडीचे उपाध्यक्ष कवडू दुधे, आझाद समाज पार्टीचे राज बनसोड, भारत रायपूरे, निलम दुधे, कांता भडके, शेषराव तुरे, नामदेव दुधे, नेताजी मेश्राम ज्याती उराडे, लता रामटेके, माला मेश्राम, संघरक्षीत बांबोळे, सतिश दुर्गमवार, भोजूभाऊ रामटेके आदिसहीत शेकडो कार्यकर्ते उपस्थित होते.