लालपरी'तील दिव्यांगांच्या हक्कासाठी सोलापूरचा 'धेडे पॅटर्न'!

वैजीनाथ धेडेंच्या धडक पाठपुराव्याने MSRTC झुकले; सोलापूर विभागात ऐतिहासिक कडक आदेश जारी

9 आगारांत 'शिस्तभंगाची कारवाई'चे आदेश; दिव्यांग प्रतिनिधीसह तक्रार निवारण समिती स्थापन होणार

चित्रा न्युज प्रतिनिधी 

चंद्रपूर : "कागदावर नियम, पण बसमध्ये अपमान" या दिव्यांग बांधवांच्या वेदनेचा अंत अखेर सोलापूरच्या मातीत झाला आहे. मोहोळ तालुक्यातील कातेवाडीचे सुपुत्र व खंबीर सामाजिक कार्यकर्ते वैजीनाथ औदुंबर धेडे यांच्या धडक प्रशासकीय लढ्यामुळे महाराष्ट्र राज्य मार्ग परिवहन महामंडळाने सोलापूर विभागासाठी ऐतिहासिक व कडक आदेश जारी केले आहेत.

एसटीच्या साधी, निमआराम, ई-शिवाई, शिवशाही, शयनयान ते शिवनेरीपर्यंत सर्व बसमध्ये दिव्यांगांसाठी जागा राखीव असूनही मैदानी पातळीवर अंमलबजावणी शून्य होती. सामान्य प्रवासी जागा सोडत नव्हते, वाहक टाळाटाळ करत होते, दिव्यांगांना अपमानास्पद वागणूक मिळत होती. 

याविरोधात वैजीनाथ धेडे यांनी दि. 7 जून 2026 रोजी पुराव्यांसह निवेदन देऊन थेट कारवाईची मागणी केली. त्याची गंभीर दखल घेत सोलापूर विभागीय नियंत्रकांनी दि. 15 जून 2026 रोजी विभागातील सर्व 9 आगार व्यवस्थापक, चालक आणि वाहकांसाठी शिस्तभंगाची कारवाई करणारे आदेश काढले.

MSRTC चे 7 ऐतिहासिक निर्णय - आता 'धेडे पॅटर्न' राज्यभर?

 

सोलापूर विभागीय कार्यालयाने जारी केलेले आदेश:  

1.  ठळक नोंद:बसमध्ये दिव्यांगांसाठी उपलब्ध आसने ठळकपणे नमूद करा.

2.  फलक सक्तीचे: आरक्षित आसनावर 'दिव्यांग आरक्षित' असे फलक लावा.

3.  वाहकाला जबाबदारी: प्रवासादरम्यान दिव्यांगांना तातडीने आरक्षित आसन उपलब्ध करून द्या.

4.  मदत बंधनकारक: दिव्यांग प्रवाशांना बसमध्ये चढताना व उतरताना वाहकाने मदत करावी.

5.  उद्धटपणावर कारवाई: दिव्यांगांशी उद्धटपणे वागणाऱ्या कर्मचाऱ्यावर शिस्तभंगाची कारवाई. अहवाल थेट विभागीय कार्यालयास.

6.  तक्रार निवारण समिती: दिव्यांग प्रतिनिधीसह समितीची स्थापना.

7.  रोज प्रबोधन: ड्युटीवर जाताना प्रत्येक चालक-वाहकाला या नियमांची लेखी समज द्या.

वैजीनाथ धेडे काय म्हणाले?

"अपंग आणि दिव्यांग बांधवांना सुरक्षित, सन्मानकारक आणि सुखाचा प्रवास मिळणे हा त्यांचा कायदेशीर अधिकार आहे. हा लढा केवळ सोलापूर पुरता मर्यादित नसून, संपूर्ण महाराष्ट्रातील परिवहन सेवेने यातून धडा घेतला पाहिजे. प्रत्येक दिव्यांग प्रवाशाला त्याचा हक्क मिळेपर्यंत आमचा हा प्रशासकीय लढा असाच सुरू राहील."

वैजीनाथ धेडे यांच्या या यशस्वी पाठपुराव्यामुळे महाराष्ट्रातील विविध दिव्यांग संघटना, राजकीय नेते व सामाजिक चळवळीतील दिग्गजांनी त्यांचे मनापासून आभार मानले आहेत. 'सोलापूरचा धेडे पॅटर्न' आता संपूर्ण राज्यात राबवावा, अशी मागणी जोर धरत आहे.

---------------------------------------------------------

दिव्यांगांच्या  हक्कासाठी 'धेडे पॅटर्न' हिट!

सोलापूरच्या वैजीनाथ धेडेंच्या लढ्याने MSRTC झुकले. सोलापूर विभागात 9 आगारांसाठी कडक आदेश: बसमध्ये 'दिव्यांग आरक्षित' फलक सक्तीचे, वाहकाने मदत करणे बंधनकारक, उद्धटपणावर शिस्तभंगाची कारवाई. रोज ड्युटीवर जाताना चालक-वाहकाला लेखी समज. दिव्यांग प्रतिनिधीसह तक्रार समिती. राज्यभर कौतुक!