चित्रा न्युज प्रतिनिधी
दिल्ली :- येथे आयोजित ९८ व्या अखिल भारतीय मराठी साहित्य संमेलनात लोकशाहीर अण्णाभाऊ साठे यांच्या जीवनावर आधारित AI तंत्रज्ञानाच्या साहाय्याने साकारलेले चित्रप्रदर्शन विशेष आकर्षण ठरत आहे. बार्शीतील संजय श्रीधर कांबळे यांनी हे अनोखे प्रदर्शन तयार केले असून, त्याच्या माध्यमातून अण्णाभाऊ साठे यांच्या संघर्षमय जीवनाचा प्रेरणादायी प्रवास उलगडला जात आहे.
२१ ते २३ फेब्रुवारी दरम्यान तालकटोरा स्टेडियम, दिल्ली येथे होणाऱ्या साहित्य संमेलनात अण्णाभाऊ साठे यांच्या कार्याला उजाळा देण्यासाठी खास व्यासपीठ उभारण्यात आले आहे. याच संमेलनात ७२×२० फूट इतक्या भव्य जागेत संजय कांबळे यांनी साकारलेल्या AI निर्मित छायाचित्रांचे प्रदर्शन भरवले आहे. यामध्ये अण्णाभाऊ साठे यांच्या बालपणापासून ते त्यांच्या रशिया प्रवासापर्यंतच्या अनेक महत्त्वपूर्ण टप्प्यांचे दर्शन घडते.
या चित्रप्रदर्शनाला शरद पवार, केंद्रीय मंत्री प्रतापसिंह जाधव, खासदार सुप्रिया सुळे, माजी मंत्री विश्वजीत कदम, लक्ष्मण ढोबळे, राज्यसभा खासदार डॉ. विनय सहस्त्रबुद्धे, आरोग्य संचालक डॉ. प्रदीप आवटे, महिला बाल कल्याण सहाय्यक आयुक्त सुवर्णा पवार यांसह अनेक मान्यवरांनी भेट देऊन चित्रप्रदर्शनाचा आनंद घेतला. विशेष म्हणजे, सरहद संस्थेचे प्रमुख संजय नहार यांनी संजय कांबळे यांना दिल्ली येथे हे प्रदर्शन सादर करण्यासाठी विशेष निमंत्रण दिले होते.
महाराष्ट्रभर उत्साह – अण्णाभाऊ साठे जयंतीनिमित्त प्रदर्शनाला भरघोस प्रतिसाद
गतवर्षी पुण्यात या चित्रप्रदर्शनास लाखो अण्णाभाऊ साठे प्रेमींचा प्रतिसाद लाभला होता. यावर्षी महाराष्ट्रातील विविध ठिकाणी अण्णाभाऊ साठे यांच्या जयंतीनिमित्त हे छायाचित्र प्रदर्शन भरवण्यात आले होते. आता दिल्लीतील साहित्यसंमेलनात याचे आयोजन झाल्याने महाराष्ट्राच्या बाहेरही अण्णाभाऊ साठे यांच्या कार्याचा प्रभाव वाढताना दिसत आहे.
AI तंत्रज्ञानाच्या सहाय्याने साकारलेली अमूल्य कलाकृती
संजय कांबळे यांनी साहित्यसम्राट अण्णाभाऊ साठे यांच्या जीवनावर आधारित AI तंत्रज्ञानाच्या माध्यमातून चित्रप्रवास उलगडणारे विशेष प्रदर्शन साकारले आहे. या प्रदर्शनाला दिल्लीत प्रचंड प्रतिसाद मिळत असून, संजय कांबळे यांचे विशेष कौतुक होत आहे.
पुस्तक प्रकाशन सोहळा आणि मित्रपरिवाराचे सहकार्य
या चित्रप्रदर्शनासोबतच अण्णाभाऊ साठे यांच्या जीवनावर आधारित एक विशेष पुस्तकही प्रकाशित करण्यात आले आहे. याचा दिल्लीमध्ये मान्यवरांच्या हस्ते प्रकाशन सोहळा पार पडत आहे. या प्रदर्शनाच्या यशस्वी आयोजनासाठी अक्षय मस्के, अक्षय वेताळ, लोकेश अनभुले, दुर्गेश काळे, शिवकुमार देडे, जयकुमार लोहार यांचा मोलाचा वाटा आहे.
अण्णाभाऊ साठे यांच्या प्रेरणादायी जीवनाचा आभासी चित्रप्रवास दिल्लीकरांसाठी विशेष आकर्षण ठरला आहे, आणि या अनोख्या उपक्रमासाठी संजय कांबळे यांचे संपूर्ण महाराष्ट्रभरून अभिनंदन होत आहे!
0 टिप्पण्या