संजय देशमुख चित्रा न्युज
सोलापूर -: संपूर्ण महाराष्ट्राचे लक्ष लागून राहिलेल्या उजनी धरणाची पातळी सोमवारी दुपारी १२ वाजता शंभर टक्के झाली. उजनी धरणातून भीमा नदीत सोमवारी सायंकाळी ५ वाजता १,२५,००० क्युसेक पाण्याचा विसर्ग करण्यात आला होता. विसर्गाची मात्रा कमी करून मंगळवारी सायंकाळी ६ वाजता ८०,००० क्युसेक करण्यात आली आहे. भीमा नदीने काल अक्राळविक्राळ रूप धारण केले होते, ज्यामुळे अनेक पूल आणि बंधारे पाण्याखाली गेले आहेत.
गेल्यावर्षी ५ ऑगस्ट २०२३ रोजी उजनी धरणात एकूण पाणीसाठा ६६.९४ टीएमसी होता, ज्यात उपयुक्त पाणी साठा केवळ ३.२८ टीएमसी होता. त्यावेळी धरण केवळ ६.१२ टक्के भरलेले होते. मात्र, या वर्षी जुलै महिन्यात भीमा खोर्‍यात पडलेल्या मुसळधार पावसामुळे उजनी धरणात मोठ्या प्रमाणात पाणी जमा झाले. सुरुवातीला धरण केवळ ३० टक्के भरलेले असतानाच, काही दिवसांतच ते ५० टक्के भरले. पाच ते सहा दिवसांच्या विश्रांतीनंतर ऑगस्ट महिन्याच्या सुरुवातीला परत मुसळधार पावसाने भीमा खोर्‍यात थैमान घातल्याने उजनी धरणात मोठी आवक झाली आणि अवघ्या चार दिवसांत धरण शंभर टक्के भरले.
दौंडवरून उजनी धरणामध्ये २ लाख क्युसेकपेक्षा जास्त पाण्याची आवक होती. सोमवारी सायंकाळी उजनी धरणातून १,२५,००० क्युसेक विसर्ग सोडण्यात आला होता, परंतु मंगळवारी सायंकाळी सहा वाजता हा विसर्ग ८०,००० क्युसेक करण्यात आला आहे. भीमा नदीने अक्राळविक्राळ रूप धारण केले असून अनेक पूल, बंधारे पाण्याखाली गेले आहेत, ज्यामुळे स्थानिक जनतेमध्ये भीतीचे वातावरण पसरले आहे.
संपूर्ण महाराष्ट्राच्या दृष्टीने उजनी धरणाच्या पातळीचा हा वाढ झालेला आकडा एक महत्त्वाचा टप्पा आहे. परंतु, या विसर्गामुळे नदीकाठच्या गावांना सतर्कतेचा इशारा देण्यात आला आहे. स्थानिक प्रशासनाने तातडीने पावले उचलून सुरक्षिततेचे उपाय योजले आहेत.
0 टिप्पण्या