सुशील कराडविरोधात गंभीर आरोप, न्यायालयीन सुनावणीची तारीख 13 जानेवारी 2025 निश्चित

चित्रा न्युज ब्युरो

सोलापूर :-येथील वाल्मिक कराड पोलिस कोठडीत असताना त्याच्या मुलाचा प्रताप समोर आला आहे. वाल्मिक कराडचा मुलगा सुशील कराड याच्यावर मॅनेजरला धमकावून मारहाण केल्याचा तसेच लुटीचे गंभीर आरोप करण्यात आले आहेत. या प्रकरणी सोलापूर जिल्हा व सत्र न्यायालयात खाजगी तक्रार दाखल करण्यात आली असून संबंधित महिलेने सुशील कराड, अनिल मुंडे आणि गोपी गंजेवार यांच्यावर गुन्हा दाखल करण्याची मागणी केली आहे.

नेमके काय घडले?

सोलापूर येथील महिलेने आपल्या अर्जात दावा केला आहे की, ती आणि तिचा कुटुंब परळी येथे राहत होते. तिचा पती सुशील कराड यांच्या ट्रेडर्समध्ये कामाला होता. महिलेच्या म्हणण्यानुसार, सुशील कराडने तिच्या पतीकडून दोन बल्कर ट्रक, दोन कार, दोन दुचाकी, तसेच प्लॉट व सोन्याचा लूटमार करून अनधिकृतरित्या मालमत्ता आपल्या नावे करून घेतली. यासोबतच, रिव्हॉल्वरचा धाक दाखवत या सर्व गोष्टी त्यांच्याकडून बळजबरीने हिसकावून घेतल्याचा दावा तिने केला आहे.

पोलीस कारवाईत दिरंगाईचा आरोप

महिलेच्या तक्रारीनुसार, एमआयडीसी पोलीस ठाण्यात तक्रार दाखल करूनही कोणतीही कारवाई करण्यात आली नाही. तसेच, पोलीस आयुक्त, सोलापूर आणि पोलीस अधीक्षक, बीड यांच्याकडेही याबाबत सविस्तर अर्ज पाठवण्यात आले. तरीदेखील कोणत्याही पोलीस अधिकाऱ्याने तक्रारीची दखल घेतली नाही.

यामुळे संबंधित महिलेने सोलापूर जिल्हा व सत्र न्यायालयात खाजगी फिर्याद दाखल केली. या तक्रारीत विविध कलमान्वये गुन्हा दाखल करण्याची मागणी करण्यात आली आहे.

न्यायालयीन प्रक्रिया आणि पुढील सुनावणी

सोलापूर जिल्हा व सत्र न्यायालयाने आरोपींचे म्हणणे मागवले असून त्यांनी आपले म्हणणे दाखल केले आहे. मात्र, आरोपींच्या वकिलाची अनुपस्थिती असल्यामुळे पुढील सुनावणी 13 जानेवारी 2025 रोजी होणार आहे. या प्रकरणात पीडितेची बाजू ऍड. विनोद सूर्यवंशी, ऍड. श्रीकांत पवार आणि ऍड. मधुकर व्हानमाने पाहत आहेत.

महिलेचे गंभीर आरोप

महिलेच्या म्हणण्यानुसार, सुशील कराड याने तिच्या पतीला धमकावत आणि मारहाण करत, रिव्हॉल्वरचा धाक दाखवून त्यांच्या मालमत्तेवर कब्जा केला. परळीतील प्लॉट अनिल मुंडे यांच्या नावे करून कोणतीही किंमत दिली नाही. तसेच, घरातील सोन्याचे दागिने विकून त्या पैशांचा गैरवापर केल्याचा आरोपही करण्यात आला आहे.

महत्त्वाचे मुद्दे

सुशील कराडविरोधात लूटमार, धमकी आणि फसवणुकीचे गंभीर आरोप.

पोलिसांनी तक्रारीची दखल न घेतल्यामुळे खाजगी तक्रार दाखल.

पुढील सुनावणी 13 जानेवारी 2025 रोजी होणार.

न्यायालयाने आरोपींच्या म्हणण्यावर आधारित निर्णय घेण्यासाठी पुढील तारखेला चौकशी ठेवली.

न्यायाच्या प्रतीक्षेत पीडितेचा कुटुंब

या प्रकरणामुळे संबंधित महिलेच्या कुटुंबावर मोठा मानसिक व आर्थिक ताण आला असून न्यायालयाच्या निर्णयाकडे संपूर्ण कुटुंब आशेने पाहत आहे.