बुद्धगया महाबोधी महाविहार मुक्ती आंदोलनात अकोला जिल्हा वंचित बहुजन आघाडीचा सहभाग

चित्रा न्युज प्रतिनिधी 

अकोला :  बुद्धगया येथील महाबोधी महाविहाराच्या संपूर्ण नियंत्रणासाठी सुरू असलेल्या आंदोलनात अकोला जिल्हा वंचित बहुजन आघाडीचे पदाधिकारी आणि कार्यकर्ते सहभागी झाले आहेत. १६ आणि १७ एप्रिल २०२५ रोजी श्रद्धेय बाळासाहेब आंबेडकर यांच्या नेतृत्वाखाली होणाऱ्या या आंदोलनात अकोल्याच्या विविध तालुक्यांतील कार्यकर्त्यांनी आंदोलन स्थळी पोहोचून आपला पाठिंबा दर्शविला आहे.

या आंदोलनाचा उद्देश महाबोधी मंदिराच्या व्यवस्थापनातून ब्राह्मण वर्चस्व हटवून बौद्ध धर्मीयांना नियंत्रण मिळवून देणे आहे. १९४९ मध्ये लागू झालेल्या बोधगया मंदिर कायद्यानुसार (Bodh Gaya Temple Act), मंदिराच्या व्यवस्थापन समितीत हिंदू आणि बौद्ध सदस्यांचा समावेश आहे, ज्यामुळे बौद्ध धर्मीयांच्या धार्मिक स्वातंत्र्यावर मर्यादा येतात.

अकोला जिल्हा वंचित बहुजन आघाडीच्या पदाधिकाऱ्यांनी सर्व कार्यकर्त्यांना आंदोलन स्थळी पोहोचून बौद्ध भिक्षूंच्या नेतृत्वाखालील या आंदोलनात सहभागी होण्याचे आवाहन केले आहे. या आंदोलनाला देशभरातून आणि आंतरराष्ट्रीय स्तरावरूनही पाठिंबा मिळत आहे.

या पार्श्वभूमीवर, अकोला जिल्ह्यातील वंचित बहुजन आघाडी आणि भारतीय बौद्ध महासभेचे कार्यकर्ते आंदोलनात सक्रिय सहभाग घेत असून, महाबोधी महाविहाराच्या मुक्तीसाठी चाललेल्या या लढ्यात आपले योगदान देत आहेत.

---