अकोला जिल्हा परिषदेतील प्रशासनाच्या भ्रष्टाचाराविरोधात वंचित बहुजन युवा आघाडीचे सीईओंना निवेदन!

चित्रा न्युज प्रतिनिधी 

अकोला : अकोला जिल्हा परिषद बांधकाम विभागात मोठ्या प्रमाणावर अनागोंदी सुरू असून, कामवाटप प्रक्रियेत मोठ्या प्रमाणावर अनियमितता होत असून, जलजीवन मिशनमध्ये कोट्यवधींचा भ्रष्टाचार तसेच खासगी शाळांमध्ये गणवेश आणि शालेय साहित्य खरेदीसाठी पालकांवर लादली जाणारी सक्ती या मुद्द्यांवर वंचित बहुजन युवा आघाडीने जिल्हा परिषदेच्या मुख्य कार्यकारी अधिकारी अनिता मेश्राम यांना निवेदन सादर केले.

निवेदनात म्हटले आहे की, बांधकाम विभागात अधिकारी आणि विशिष्ट कंत्राटदारांच्या संगनमताने कामवाटपाची प्रक्रिया पूर्णपणे भ्रष्ट पद्धतीने चालवली जाते. मजूर सोसायटी, सुशिक्षित बेरोजगार अभियंता आणि लहान कंत्राटदारांना शासन निर्णयांचे पालन न करता केवळ किरकोळ कामांवर बोळवण केली जाते, तर मोठी कामे ठराविक कंत्राटदारांना ई-निविदा न करता मिळतात. एकाच संगणकावरून निविदा भरल्या जात असून डिजिटल सिग्नेचरचा गैरवापर होत असल्याचा गंभीर आरोप करण्यात आला आहे.

निवेदनात पुढे स्पष्ट करण्यात आले आहे की, शासनाच्या आदेशाने कामे 'क्लब' करून रक्कम वाढवली जाते, ज्यामुळे लहान कंत्राटदार थेट स्पर्धेबाहेर जातात. हा प्रकार देखील मोठ्या प्रमाणावर भ्रष्टाचाराला कारणीभूत आहे.

जलजीवन मिशनमधील भ्रष्टाचाराचेही धक्कादायक तपशील जिल्ह्यातील २८४ पैकी केवळ ११२ जलजीवन मिशनची कामे पूर्ण झाली असल्याचे आकडे असून, प्रत्यक्षात अनेक ठिकाणी केवळ कागदावरच योजना पूर्ण झाल्याचे भासवून मोठ्या प्रमाणात निधीचा अपव्यय झाल्याचा आरोप करण्यात आला. अनेक गावे अजूनही पाण्याविना आहेत, रस्ते खोदलेले आहेत, तर पाण्याचा शाश्वत स्रोत उपलब्ध नसतानाही बिले काढून कामे पूर्ण दाखवण्यात आली आहेत.

शाळांतील सक्तीवरही आवाज -

अकोला जिल्ह्यातील खासगी शाळांमध्ये पालकांना विशिष्ट दुकानातूनच गणवेश व पुस्तके खरेदी करण्यास भाग पाडले जात असल्याची तक्रारही यावेळी करण्यात आली. शिक्षण विभाग या गोष्टीकडे दुर्लक्ष करत असून, यावर तातडीने कार्यवाही करण्याची मागणी करण्यात आली आहे.

या निवेदन प्रसंगी वंचित बहुजन युवा आघाडीचे प्रदेश महासचिव राजेंद्रभाऊ पातोडे यांनी स्पष्ट शब्दांत प्रशासनाच्या अकार्यक्षमतेवर बोट ठेवत संबंधित अधिकाऱ्यांची चौकशी करून दोषींवर कडक कारवाई करण्याची मागणी केली.

यावेळी जिल्हाध्यक्ष श्रीकांत घोगरे, जिल्हा महासचिव राजकुमार दामोदर, महानगर अध्यक्ष वैभव खडसे, सचिन शिराळे, सुरेंद्र तेलगोटे, जय तायडे, आकाश गवई, आकाश जंजाळ, सूरज दामोदर (सोशल मीडिया प्रमुख), नागेश उमाळे, योगेश वाडाळ, संतोष वनवे, राजेश बोदडे, अमोल डोंगरे, विजय पातोडे आदी कार्यकर्ते उपस्थित होते.