पीएम श्री केंद्रीय विद्यालय चांदा येथील श्रावक मेढणकरची INSPIRE MANAK पुरस्कारासाठी निवड;

 राज्यस्तरावर झळकणार भद्रावतीचे नाव

चित्रा न्युज प्रतिनिधी 

चंद्रपूर : भद्रावती  येथील पीएम श्री केंद्रीय विद्यालय ओ.एफ. चांदा येथील इयत्ता आठवीचा विद्यार्थी श्रावक मेढणकर याची भारत सरकारच्या विज्ञान व तंत्रज्ञान विभागाच्या प्रतिष्ठित इन्स्पायर मानक योजनेसाठी निवड झाली असून, त्याने शाळेसह परिसराचे नाव उज्ज्वल केले आहे.

श्रावकने सादर केलेल्या नाविन्यपूर्ण वैज्ञानिक संकल्पनेची जिल्हास्तरावर निवड करण्यात आली. या प्रकल्पाचा नमुना म्हणजेच प्रोटोटाइप विकसित करण्यासाठी त्याला 10 हजार रुपयांचे अनुदान मंजूर झाले आहे.

या निधीच्या सहाय्याने त्याने आपल्या कल्पनेवर आधारित कार्यरत नमुना तयार केला असून, शिक्षक व मार्गदर्शकांच्या सहकार्याने प्रकल्प अधिक परिपूर्ण केला आहे. श्रावकने आपल्या अभिनव कल्पनेतून वैज्ञानिक दृष्टिकोन, सर्जनशीलता आणि समस्यांवर उपाय शोधण्याची क्षमता सिद्ध केली आहे.

त्याच्या या यशाची दखल घेत त्याची निवड आता केव्हीएस (KVS) राज्यस्तरीय स्पर्धेसाठी करण्यात आली असून, ही स्पर्धा लवकरच आयोजित करण्यात येणार आहे.

या यशाबद्दल विद्यालयाचे प्राचार्य, शिक्षक व विद्यार्थ्यांनी श्रावकचे अभिनंदन केले. त्याच्या नाविन्यपूर्ण विचारसरणीमुळे आणि जिद्दीमुळे इतर विद्यार्थ्यांनाही विज्ञान, संशोधन व नवोपक्रम क्षेत्रात कार्य करण्याची प्रेरणा मिळेल, असा विश्वास त्यांनी व्यक्त केला.

 इन्स्पायर मानक योजना विद्यार्थ्यांना दैनंदिन जीवनातील समस्यांवर नाविन्यपूर्ण उपाय शोधण्यासाठी प्रोत्साहन देते. त्यांच्यामध्ये वैज्ञानिक विचारसरणी, संशोधनाची आवड आणि नवोपक्रमाची संस्कृती विकसित करण्याचे महत्त्वपूर्ण कार्य ही योजना करते.

----------------------------------------------

भद्रावतीच्या श्रावकची 'इन्स्पायर' कामगिरी!

पीएम श्री केंद्रीय विद्यालय ओ.एफ. चांदा येथील 8 वीचा विद्यार्थी श्रावक मेढणकर याची INSPIRE MANAK योजनेसाठी निवड. नाविन्यपूर्ण वैज्ञानिक कल्पनेला 10 हजारांचे अनुदान. प्रोटोटाइप तयार करून जिल्हास्तरावर बाजी. आता KVS राज्यस्तरीय स्पर्धेत भद्रावतीचे नाव झळकणार, प्राचार्य,शिक्षकांकडून अभिनंदाचा वर्षाव