मोहन जगजेकर सोशल मीडिया प्रतिनिधी महाराष्ट्र राज्य
मों-9022898029
नांदेड:- नांदेड जिल्ह्यातील आणखी एक अधिकारी नागपूरला बदली होऊन जात आहेत. देगलूर येथे कार्यरत आयएएस अधिकारी सहाय्यक जिल्हाधिकारी सौम्या शर्मा यांची नागपूर जिल्हा परिषदेच्या सीईओपदी बदली झाली आहे. सौम्या शर्मा यांच्या नागपूर येथे झालेल्या बदलीनंतर नांदेडहून नागपूरला बदली होण्याचा जणू एक ट्रेंडच सुरू झाल्याचे दिसून येत आहे.
राज्य शासनाने आज सात आयएएस अधिकाऱ्यांच्या बदल्यांचे आदेश काढले. यात नांदेड जिल्ह्यात देगलूर येथे सहाय्यक जिल्हाधिकारी पदावर कार्यरत आयएएस अधिकारी सौम्या शर्मा यांची नागपूर जिल्हा परिषदेच्या सीईओपदी बदली झाली आहे. त्यांच्या नागपूर येथे झालेल्या या बदलीमुळे नांदेडहून एकामागून एक अधिकारी नागपूरला बदलून जात असल्याच्या योगायोगाची बाब चर्चेत आली आहे.
काही दिवसांपूर्वीच नांदेडचे जिल्हाधिकारी डॉ. विपीन इटनकर यांची नागपूरच्या जिल्हाधिकारीपदी बदली झाली आहे. त्यानंतर नांदेडचे निवासी उपजिल्हाधिकारी प्रदीप कुलकर्णी यांची नागपूर विभागीय आयुक्तालयात उपायुक्त पदावर बदली झाली. तत्पूर्वी नांदेडचे जिल्हा पोलीस अधीक्षक विजयकुमार मगर यांची नांदेडहून नागपूरचे जिल्हा पोलीस अधीक्षक पदावर बदली झाली होती. त्यानंतर आता देगलूरच्या सहाय्यक जिल्हाधिकारी सौम्या शर्मा यांची नागपूर जिल्हा परिषदेच्या सीईओपदी बदली झाली आहे.
नांदेडहून नागपूरला बदली झालेल्या अधिकाऱ्यांचा कार्यकाळ पूर्ण झाल्याने त्यांची बदली झालेली असली नांदेड टू नागपूर अशी होणाऱ्या या बदल्यांच्या योगायोगाची चांगलीच चर्चा नांदेडमध्ये होत आहे.
राज्यात आयएएस अधिकाऱ्यांच्या १२ ऑक्टोबरला बदल्या झाल्या. त्यानंतर ३५ दिवसानंतर आज पुन्हा राज्य सरकारने आयएएस अधिकाऱ्यांच्या बदलीचे आदेश काढले आहेत. त्यात आता आणखी काही अधिकाऱ्यांच्या बदल्या झाल्या आहेत. राज्य उत्पादन शुल्क विभागाचे आयुक्त कांतीलाल उमाप हे बुधवार, ३० नोव्हेंबर रोजी सेवानिवृत्त होत आहेत. त्यांच्या जागी डॉ. व्ही. एन. सूर्यवंशी यांची नियुक्ती झाली आहे.
0 टिप्पण्या