चित्रा न्युज प्रतिनिधी
छत्रपती संभाजीनगर –: महानगरपालिका निवडणुकीच्या धामधुमीत छत्रपती संभाजीनगरमध्ये राजकीय वातावरण चांगलेच तापले आहे. एमआयएमचे (AIMIM) प्रदेशाध्यक्ष आणि माजी खासदार इम्तियाज जलील यांच्या प्रचार रॅलीदरम्यान त्यांच्या वाहनावर हल्ला झाल्याची धक्कादायक घटना बुधवारी (दि. ७) दुपारी घडली. या प्रकरणी पोलिसांनी तत्परतेने कारवाई करत काँग्रेस उमेदवार कलिम कुरेशी यांच्यासह ६० जणांवर गुन्हा दाखल केला आहे.
बुधवारी दुपारी एमआयएमतर्फे प्रभाग १४ मधील बैजीपुरा ते नवाबपुरा चौकात पदयात्रेचे आयोजन करण्यात आले होते. दुपारी १:१५ च्या सुमारास ही रॅली जिन्सी भागात पोहोचली असता, तेथे काँग्रेस उमेदवार कलिम कुरेशी आणि त्यांचे समर्थक उपस्थित होते. यावेळी दोन्ही गटांत जोरदार घोषणाबाजी सुरू झाली, ज्याचे रूपांतर काही वेळातच वादावादीत आणि हाणामारीत झाले.
प्रत्यक्षदर्शींनी दिलेल्या माहितीनुसार, जमावातील काहींनी जलील यांच्या ताफ्यावर अंडी फेकली आणि काळे झेंडे दाखवले. तसेच, त्यांची एसयूव्ही (SUV) गाडी अडवून तोडफोड करण्याचा आणि जलील यांना गाडीबाहेर ओढण्याचा प्रयत्न झाला. या घटनेचे व्हिडिओ सोशल मीडियावर प्रचंड व्हायरल झाले आहेत.
परिस्थिती नियंत्रणात आणण्यासाठी पोलिसांना सौम्य लाठीचार्ज करावा लागला. अवघ्या २५ मिनिटांत जमाव पांगवण्यात पोलिसांना यश आले. या प्रकरणी जिन्सी पोलीस ठाण्यात भारतीय न्याय संहितेच्या (BNS) विविध कलमांनुसार (कलम १३२, १८९(२), १९१(२), १९०, १२६(२) इत्यादी) आणि महाराष्ट्र पोलीस कायद्याअंतर्गत गुन्हा दाखल करण्यात आला आहे.
या हल्ल्यामागे राजकीय षडयंत्र असल्याचा आरोप इम्तियाज जलील यांनी केला आहे. ते म्हणाले, "हा हल्ला कलिम कुरेशीच्या नेतृत्वात आणि भाजप मंत्री अतुल सावे व संजय शिरसाट यांच्या सांगण्यावरून झाला आहे. कुरेशी हे अवैध धंद्यांशी संबंधित असून, पोलिसांना पूर्वकल्पना देऊनही त्यांनी सुरक्षा पुरवली नाही."
दुसरीकडे, काँग्रेस उमेदवार कलिम कुरेशी यांनी हे आरोप फेटाळून लावले आहेत. "एमआयएममध्ये तिकीट न मिळाल्याने नाराज कार्यकर्त्यांनीच हे कृत्य केले असावे किंवा प्रसिद्धीसाठी जलील यांनी स्वतः हे घडवून आणले असावे," असा पलटवार त्यांनी केला. संजय शिरसाट यांनीही आरोप सिद्ध झाल्यास राजकारण सोडण्याचे आव्हान दिले आहे.
या घटनेनंतर शहरात तणावपूर्ण शांतता असून, संवेदनशील भागात मोठा पोलीस बंदोबस्त तैनात करण्यात आला आहे. एमआयएम प्रमुख असदुद्दीन ओवैसी यांनी या हल्ल्याचा तीव्र शब्दांत निषेध केला आहे.
0 टिप्पण्या