महिला शेतकरी उत्पादक कंपन्यांच्या संचालकांसाठी एकदिवसीय प्रशिक्षण

पोंगेझरा फार्मर प्रोड्युसर कंपनीत जिल्ह्यातील पहिला विशेष अभ्यासदौरा; अध्यक्ष सुरेंद्रजी बिसेन यांचे मार्गदर्शन

चित्रा न्युज प्रतिनिधी 

गोरेगांव : महाराष्ट्र राज्य ग्रामीण जीवनोन्नती अभियान (MSRLM) अंतर्गत SMART प्रकल्पाच्या माध्यमातून महिला शेतकरी उत्पादक कंपन्यांच्या संचालकांसाठी आयोजित एकदिवसीय प्रशिक्षण व विशेष अभ्यासदौरा मंगळवारी (दि. ११ ऑगस्ट) पोंगेझरा फार्मर प्रोड्युसर कंपनी लिमिटेड, घोटी (ता. गोरेगाव, जि. गोंदिया) येथे उत्साहात पार पडला. जिल्ह्यातील महिला शेतकरी उत्पादक कंपन्यांच्या संचालकांसाठी आयोजित करण्यात आलेला हा विशेष अभ्यासदौरा जिल्ह्यातील पहिला असल्याची माहिती यावेळी देण्यात आली.

जिल्हा परिषद, गोंदिया यांच्या मार्गदर्शनाखाली तसेच RSETI, गोंदिया यांच्या माध्यमातून आयोजित या प्रशिक्षण व अभ्यासदौऱ्यास जिल्ह्यातील विविध महिला शेतकरी उत्पादक कंपन्यांच्या संचालकांची उपस्थिती होती. महिला शेतकऱ्यांना संघटित करून त्यांना आत्मनिर्भर, सक्षम व व्यवसायाभिमुख करण्याच्या उद्देशाने या उपक्रमाचे आयोजन करण्यात आले.

पोंगेझरा कंपनीच्या कार्यपद्धतीची दिली सविस्तर माहिती

यावेळी पोंगेझरा फार्मर प्रोड्युसर कंपनीचे अध्यक्ष तथा माजी उपसभापती, पंचायत समिती गोरेगाव, मा. सुरेंद्रजी बिसेन यांनी उपस्थित महिला संचालकांना कंपनीची स्थापना, उद्दिष्टे, व्यवसायाची वाटचाल, कृषीआधारित विविध उपक्रम, व्यवसाय मॉडेल, शेतमालाचे मूल्यवर्धन, बाजारपेठेशी जोडणी तसेच शेतकऱ्यांना उपलब्ध करून दिल्या जाणाऱ्या सुविधांची सविस्तर माहिती दिली.

महिला शेतकरी उत्पादक कंपन्यांनी केवळ कंपनी स्थापन करण्यापुरते मर्यादित न राहता उपलब्ध संसाधने, मनुष्यबळ आणि बाजारपेठेचा योग्य वापर करून व्यवसायाभिमुख पद्धतीने काम करणे आवश्यक आहे, असे सुरेंद्रजी बिसेन यांनी सांगितले.

अडचणींवर मात करण्यासाठी दिला प्रत्यक्ष अनुभवातून सल्ला

महिला शेतकरी उत्पादक कंपन्यांना व्यवसाय करताना येणाऱ्या विविध अडचणी, व्यवस्थापन, उत्पादनांचे मूल्यवर्धन, बाजारपेठ, व्यवसाय विस्तार तसेच कंपनीच्या दैनंदिन कामकाजाबाबत उपस्थित महिला संचालकांनी प्रश्न विचारले. या प्रश्नांना सुरेंद्रजी बिसेन यांनी प्रत्यक्ष अनुभवाच्या आधारे मार्गदर्शन करून योग्य सल्ला दिला. त्यामुळे उपस्थित महिला संचालकांना आपल्या कंपन्यांच्या व्यवसायवृद्धीसाठी उपयुक्त दिशा मिळाली.

विविध विभागांच्या माध्यमातून महिला संचालकांना सहकार्य

अभ्यासदौऱ्यात विविध शासकीय विभागांच्या प्रतिनिधींनीही महिला संचालकांना मार्गदर्शन केले. कृषी, व्यवसाय व्यवस्थापन, कंपनी संचालन, उत्पादनांचे मूल्यवर्धन, बाजारपेठ आणि उपलब्ध शासकीय योजनांचा प्रभावी वापर याबाबत माहिती देण्यात आली.

पोंगेझरा फार्मर प्रोड्युसर कंपनीच्या प्रत्यक्ष कामकाजाची पाहणी करताना महिला संचालकांना कंपनीतील विविध उपक्रम, व्यवसाय नियोजन आणि कृषीआधारित उद्योग उभारणीची प्रत्यक्ष माहिती मिळाली.

महिला सक्षमीकरणाचा दिला संदेश

महिला शेतकऱ्यांनी संघटित होऊन आपल्या शेतीमालाचे उत्पादन, प्रक्रिया, मूल्यवर्धन व विक्री यामध्ये सक्रिय सहभाग घेतल्यास ग्रामीण अर्थव्यवस्थेला मोठी चालना मिळू शकते. महिला शेतकरी उत्पादक कंपन्यांच्या माध्यमातून महिलांना आर्थिकदृष्ट्या सक्षम करून त्यांना कृषी व्यवसायाच्या मुख्य प्रवाहात आणण्याचा प्रयत्न या अभ्यासदौऱ्यातून करण्यात आला.

महिला संचालकांना व्यवसाय नियोजन, बाजारपेठेचा अभ्यास, शेतमालाचे मूल्यवर्धन, कंपनी व्यवस्थापन आणि उत्पन्नवाढीच्या संधी याबाबत मिळालेले मार्गदर्शन भविष्यात त्यांच्या कंपन्यांच्या प्रगतीसाठी महत्त्वपूर्ण ठरणार असल्याचे यावेळी सांगण्यात आले.

SMART प्रकल्पांतर्गत झालेल्या या एकदिवसीय प्रशिक्षण व अभ्यासदौऱ्यामुळे महिला शेतकरी उत्पादक कंपन्यांच्या संचालकांना पोंगेझरा फार्मर प्रोड्युसर कंपनीच्या कार्याचा प्रत्यक्ष अनुभव मिळाला. ग्रामीण महिलांच्या आत्मनिर्भरता, सक्षमीकरण आणि कृषी व्यवसायवृद्धीच्या दृष्टीने हा अभ्यासदौरा अत्यंत उपयुक्त ठरला.