संजय देशमुख चित्रा न्युज
सिंधुदुर्ग :-जिल्ह्यातील मालवण शहरात आज, 28 ऑगस्ट 2024, महाविकास आघाडीने (मविआ) शहर बंदची हाक दिली आहे. बंदचे मुख्य कारण म्हणजे छत्रपती शिवाजी महाराज यांचा पुतळा कोसळल्याचा प्रकार. आठ महिन्यांपूर्वी नौदलदिनानिमित्त उभारलेला शिवरायांचा पुतळा वादळी वाऱ्यामुळे कोसळल्याची घटना घडली होती, परंतु या प्रकरणी दोन व्यक्तींवर गुन्हे दाखल करण्यात आले आहेत.
मविआच्या नेत्यांनी या घटनेचा निषेध करत, छत्रपती शिवाजी महाराज यांच्या पुतळ्याच्या अपमानामुळे संपूर्ण महाराष्ट्राच्या भावना दुखावल्या गेल्याचे म्हटले आहे. या घटनेच्या निषेधार्थ मविआने आज मालवण बंदची हाक देऊन एक मोठा निषेध मोर्चा आयोजित केला आहे. शरद पवार गटाचे ज्येष्ठ नेते जयंत पाटील या मोर्चात सहभागी होणार असल्याने या मोर्चाकडे संपूर्ण महाराष्ट्राचे लक्ष लागले आहे.
या मोर्चाद्वारे मविआ सरकार आणि संबंधित अधिकाऱ्यांकडे या घटनेची सखोल चौकशी करण्याची मागणी करणार आहे. शिवाय, दोषींवर कठोर कारवाई करण्याचे आवाहनही करण्यात येणार आहे. मालवण शहरातील बंदमुळे जनजीवनावर काही प्रमाणात परिणाम होण्याची शक्यता आहे. बंदच्या पार्श्वभूमीवर सुरक्षेच्या दृष्टीने पोलिसांनी कडक बंदोबस्त ठेवला आहे.
मविआच्या या बंदला स्थानिक नागरिक आणि व्यापाऱ्यांकडून काही प्रमाणात समर्थन मिळाल्याचे दिसत आहे. बंद दरम्यान कोणतीही अनुचित घटना घडू नये म्हणून पोलीस प्रशासनाने कडक उपाययोजना केल्या आहेत.
0 टिप्पण्या