दिव्यांग विद्यार्थ्यांच्या आंदोलनाला वंचित बहुजन आघाडीचा जाहीर पाठिंबा

चित्रा न्युज प्रतिनिधी 

पुणे : समाज कल्याण आयुक्तालय तसेच दिव्यांग कल्याण आयुक्तालयाबाहेर दिव्यांग विद्यार्थ्यांनी सुरू केलेल्या अन्नत्याग उपोषण आंदोलनाला वंचित बहुजन आघाडी आणि सम्यक विद्यार्थी आंदोलनाने जाहीर पाठिंबा दिला आहे. वसतिगृहांमधील समांतर आरक्षण रद्द करून दिव्यांग विद्यार्थ्यांना ५ टक्के आरक्षण लागू करण्याच्या मागणीसाठी हे आंदोलन सुरू आहे.

दिव्यांग विद्यार्थ्यांच्या न्याय्य हक्कांसाठी सुरू असलेल्या या आंदोलनाला भेट देत वंचित बहुजन आघाडी व सम्यक विद्यार्थी आंदोलनाच्या पदाधिकाऱ्यांनी आंदोलक विद्यार्थ्यांशी संवाद साधला. यावेळी सम्यक विद्यार्थी आंदोलनाचे पुणे शहर महासचिव अभिषेक कांबळे यांनी पक्षाचा अधिकृत पाठिंबा जाहीर करत दिव्यांग विद्यार्थ्यांच्या हक्कांच्या लढ्यात वंचित बहुजन आघाडी आणि सम्यक विद्यार्थी आंदोलन खंबीरपणे त्यांच्या पाठीशी उभे राहील, असे आश्वासन दिले.

आंदोलनाचे प्रमुख गौरव मालक आणि शुभम नरवडे यांनी दिव्यांग विद्यार्थ्यांच्या मागण्यांची माहिती उपस्थितांना दिली. वसतिगृह प्रवेश प्रक्रियेत दिव्यांग विद्यार्थ्यांना स्वतंत्र ५ टक्के आरक्षण मिळावे आणि समांतर आरक्षणाची पद्धत रद्द करावी, अशी त्यांची प्रमुख मागणी आहे. यावेळी सम्यक विद्यार्थी आंदोलनाचे पदाधिकारी, कार्यकर्ते तसेच मोठ्या संख्येने दिव्यांग विद्यार्थी उपस्थित होते. आंदोलनाच्या मागण्या मान्य करून शासनाने तातडीने सकारात्मक निर्णय घ्यावा, अशी मागणी आंदोलकांनी केली.