साकोलीत २.५ कोटींच्या गांजासह आरोपी अटकेत

◾एनसीबी मुंबई व साकोली पोलीसांची संयुक्त कारवाई • 

चित्रा न्युज प्रतिनिधी 

साकोली : अंमली पदार्थांविरोधातील एका मोठ्या कारवाईत, नार्कोटिक्स कंट्रोल ब्युरो ( एनसीबी ) मुंबई विभागीय पथकाने साकोली परिसरात ओडिशाहून नागपूरकडे नेला जाणारा २४५ किलो उच्च दर्जाचा गांजा जप्त केला आहे. ही कारवाई काल ३० जूनला एनसीबी व साकोली पोलीसांनी सापळा रचून केली. एनसीबी मुंबईचे अतिरिक्त संचालक अमित घावट यांच्या मार्गदर्शनाखाली मिळालेल्या संपूर्ण गुप्त माहितीच्या आधारे ही कारवाई करण्यात आली. माहिती मिळताच तत्परतेने पावले उचलत एनसीबी च्या पथकाने संबंधित वाहन साकोली पथकर नाक्यावर अडवले आणि त्याची झडती घेतली असता ज्यामध्ये मोठ्या प्रमाणात कॅरेट मध्ये गांजा आढळून आला.

सदर गांजा पोलीस निरीक्षक एम. पी. आचरेकर यांच्या साकोली पथकाने वाहनांसह साकोली पोलीस ठाणे येथे आणले. याप्रकरणी कामेश बिरनसिंग बघेल वय ४२ रा. नागपूर आणि प्रशांत धुर्वे वय २३ रा. वरूड ( अमरावती ) या दोघांना अटक करण्यात आली आहे. प्राथमिक तपासात असे निष्पन्न झाले आहे की, हा अवैध साठा ओडिशाहून नागपूरला नेला जात होता. जप्त केलेल्या गांजाची अवैध बाजारातील अंदाजित किंमत सुमारे २.५ कोटी रुपये आहे. अंमली पदार्थांच्या तस्करीविरुद्धच्या लढ्यातील हे एक मोठे यश मानले जात आहे. अधिकाऱ्यांनी सांगितले की,

या वेळेवर केलेल्या कारवाईमुळे मोठ्या प्रमाणात प्रतिबंधित अंमली पदार्थ बाजारात पोहोचण्यापासून रोखले गेले आहेत; तरुणांना अमली पदार्थांच्या आहारी जाण्यापासून वाचवण्याच्या दृष्टीने हे एक महत्त्वपूर्ण पाऊल आहे. आता एनसीबी या तस्करीच्या जाळ्याशी संबंधित मागील आणि पुढील दुवे तपासत आहे, जेणेकरून या रॅकेटमध्ये सहभागी असलेल्या इतर व्यक्तींची ओळख पटवून त्यांच्यावर योग्य कायदेशीर कारवाई करता येईल. सध्या सविस्तर तपास सुरू असून अंमली पदार्थ प्रतिबंधक कायदा तरतुदींनुसार आवश्यक कायदेशीर कार्यवाही केली जात आहे. या नाकेबंदी कारवाईत उपविभागीय पोलीस अधिकारी शिवम विसापूरे, पोलीस निरीक्षक एम. पी. आचरेकर, सहा. पो. निरिक्षक राऊत, सर्व पोलीस उपनिरीक्षक आणि पोलिस चमुंनी ही धडक कारवाई केली.